Улууспутугар «Горнай-Ас» ТХПК үүт сыаҕа ньиргиччи үлэлээн, өрөспүүбүлүкэни, улууһу хааччыйан олорор. Манна үрүҥ астан үүтү, иэдьэгэйи, суораты, арыыны, сүөгэйи, күөрчэх үүтүн о.д.а оҥороллор. Сибиэһэй бородууксуйаны дьон-сэргэ сөбүлээн ылар. Кооператив аҥаардас бииринэн эрэ муҥурдаммакка үрүҥ ас араас бары көрүҥэр ылсан нэһилиэнньэни күндүлүүрэ кэрэхсэбиллээх.

Бу күннэргэ үүт сыаҕар «Үрдэл» диэн ааттаах, кытаанах аҥаардаах сыыры бэлэмнээн атыыга таһаараары сылдьалларын истэммит, хайдах быһыылаахтык оҥороллорун,  миэстэтигэр тиийэн көрдүбүт. Сыахха лаборант Екатерина Стручкова, технолог Данил Сидоров биһигини үөрэ көрүстүлэр. Бородууксуйаларын туһунан ирэ-хоро кэпсииллэр:

– «Сыыр үүт сордуттан улахан тутулуктаах. Ирдэбилгэ барытыгар эппиэттиир, үрдүк хаачыстыбалаах үүтүнэн оҥоробут. Биһиги сыырбыт кытаанах аҥаардаах сыыр көрүҥүгэр киирсэр. Үүт «Үрдэл» сыыр састаабыгар үүт, аһытыы (заскваска), үүт сүүрдэр фермент (молоко-свертывающий фермент) баар. Сыата – 27 гр., белога – 25, 5 гр. тэҥнэһэр. 200 кг үүттэн түөртүү киилэлээх биэс төгүрүк сыыр тахсар. Оҥоһуллубутун кэнниттэн икки ый устата туран ситэр. Ол кэнниттэн атыыга тахсан, ыал сандалытыгар маанылаах ас быһыытынан ууруллуоҕа, – диэн Екатерина Стручкова санаатын үллэһиннэ.

Билэрбит курдук, үрүҥ илгэ күөх сайын эрэ дэлэйдик кэлэр. Хороҕор муостаах ынахпыт күһүҥҥү кэмтэн үүтэ намтаан барар. Оччоҕо ас-үөл тахсыыта эмиэ кыччыыр. Үүт өлгөм кэмигэр кооператив үрүҥ ас араас бородууксуйатын оҥорон, киһи доруобуйатыгар туһалаах, иҥэмтэлээх аһы таһааран, дьону-сэргэни үөрдэ турдун.

Саҥа бэйэ бородууксуйатын ылан амсайыахпыт, боруобалыахпыт, сыаналыахпыт.