Ааспыт өрөбүллэргэ Хатаска волейболга СахаВА супер-финала буолла. Күрэхтэһии ааспыт үйэ 90-с чаҕылхай спортсмена Григорий Попов сырдык аатыгар ананна.

Өрөспүүбүлүкэ биир саамай улахан күрэхтэһиитэ эдэриттэн аҕам саастаах дьонугар тиийэ 56 хамаанданы түмтэ.

Биһиги улууспут аатын кыргыттарбыт чаҕылхайдык көмүскээтилэр. Ол курдук, эдэрдэргэ үс бастыҥ иһигэр киирэр иһин олус тыҥааһыннаах оонньууга горнайдар Бүлүү хамаандатын хотон, боруонса мэтээли ылары ситистилэр.

35 саастан үөһэ кэрэ аҥаардарга биһиги хамаандабыт кыһыл көмүс мэтээл иһин киирсиигэ «Сахабэчээт» хамаандатыгар бэрт кыранан сабырыйтардылар. Үһүс миэстэҕэ хатастар таҕыстылар.

Биһиги кыргыттарбыт кыайыыга дьулуһууларын тэрийээччилэр бэрт үрдүктүк сыаналаатылар. Олохтоммут номинацияларга — «Бастыҥ көмүскээччи» Туяра Алексеева, «Бастыҥ кимээччи» Айталина Дагданча ааттаннылар. Ону таһынан, Григорий Попов дьиэ кэргэнин анал бирииһин Валерия Николаева, Афанасий Ядрихинскай сыаналаах бирииһин Туяра Алексеева тутан, үөрүүлэрэ үксээтэ.

Киэҥ биһирэбили ылар күрэхтэһиигэ, улууспут хамаандата үрдүк көрдөрүүнү ситистэ. Өрөспүүбүлүкэ күүстээх хамаандаларын кытары тэҥҥэ киирсэн, баһыйан, үс бастыҥ иһигэр киирсэр кыахтаахтарын бигэргэттилэр. Инникитин ылбыт таһымнарын ыһыктыбакка ситиһиилэр кэлэ туруохтара диэн эрэнэбит.

Сиһилии сайтка

https://сила-труда.рф/volejbolist-kyrgyttarbyt-hataska-doһun-sitiһiilenniler/