Бүгүн улууспутугар биир бэлиэ, үөрүүлээх күн буолла. Ол курдук, Улуу Кыайыы 80 сылын, Россия күнүн көрсө Атамайга күүтүүлээх, саҥа административнай култуурунай-спортивнай комплекс нэһилиэнньэ иннигэр аанын тэлэччи арыйда.

Олохтоохтор үөрүүлэрин Ил Дархан Айсен Николаев, улуус баһылыга Никита Андреев үллэһиннилэр.

Бэрт тупсаҕай көстүүлээх икки этээстээх баараҕай тутуу Дьүктүөнэ Эбэ үрдүгэр турар. Объекка нэһилиэк дьаһалтата, сынньалаҥ киинэ, спортивнай саала, почта, библиотека уонна общественнай түмсүүлэр үлэлиэхтэрэ. Олохтоохтор олус наадалаах тэрилтэлэр бары биир сиргэ баар буолбуттара олус табыгастаах диэн үөрүүлэрэ муҥура суох. Бу маннык улахан тутуу үлэҕэ киирэригэр Россия Президенэ Владимир Путин быһаччы дьаһалынан, Ил Дархан Айсен Николаев, улуус баһылыга Никита Андреев туруорсууларынан сүҥкэн, сыаналаммат өҥөлөөхтөр диэн дьон-сэргэ махтала муҥура суох.

Өрөспүүбүлүкэ, улуус, нэһилиэк социальнай экономическай сайдыытыгар саҥа объект төһүү күүс буолара саарбаҕа суох диэн дьон-сэргэ сүргэтэ көтөҕүллэн туран, үөрүүлэрин үллэстэллэр.